LA CONSAGRACIÓN DE LA PRIMAVERA

Roger Bernat /FFF
Egilea eta zuzendaria: Roger Bernat
Antzezleak: Publiko bera

Roger Bernatek dantzari profesionalik gabe irudikatu zuen La Consagración de la Primavera, ikusleak interprete bihurtuta.

Pina Bausch-ek 1975ean sortu zuen La Consagración de la Primavera, Igor Stravinskyren jatorrizko partitura batetik abiatuta, Tanztheater Wuppertal konpainiarentzat. Alemaniako antzerki-dantzaren lan ikoniko bat da. Hizkera koreografiko sentsuala, basatia eta biziki gizatiarra baliatuta, aztergai ditu, besteak beste, kolektibitatea, sakrifizioa eta gorputzen gaineko zapalkuntza.
Parte-hartzaileek, espazio huts batean eta aurikularrak jantzita, koreografiari eta ibilerari buruzko jarraibide sinpleak jasoko dituzte. Pixkanaka-pixkanaka, keinu indibidual horiek erritu bat osatuko dute. Ikusleak artista bihurtuko dira, beharbada erabat ulertuko ez duten mekanismo baten baitan. Ezinegona pizten duen lan erradikala, pertsona oro aurrez aurre jarriko duena talde-dinamikan daukan rolarekin.

Ikuskizuna euskaraz edo gaztelaniaz esperimentatu daiteke. Gutxieneko edukiera bat behar da hizkuntza bakoitzean.