BOS kontzertua

Javier Bustamanteri omenaldia

Urtero bezala, Bilboko Orkestra Sinfonikoaren kontzertua gozatzeko aukera izango dugu irailean, Serantes Kultur Aretoan.

2022an ehun urte beteko dituen orkestra horrek 1922ko martxoaren 8an eman zuen lehen kontzertua Arriaga antzokian, Armand Marsicken zuzendaritzapean.

Orkestraren egoitza den Euskalduna Jauregiko ohiko kontzertu-denboraldiaz gain, BOSek ganbera-musikako denboraldiak eskaintzen ditu Bilbon eta Bizkaian, lan pedagogiko garrantzitsua egiten du Kontzertu didaktikoen bidez eta Familian, eta gizarteratze-jarduerak garatzen ditu musikaren bidez. OLBEren operetan aldizka parte hartzen du zulo-orkestra gisa, eta lankidetza-ildoak ditu Guggenheim museoarekin, Bilboko Arte Ederren Museoarekin, Deustuko Unibertsitatearekin eta Bilboko Arriaga Antzokiarekin batera antolatutako programetan.

Aurten Mikel Fernández izango da zuzendaria eta Imanol Casán piano-jotzailea. Bedrich Smetana, Mozart eta Tchaikosvkyren lanak joko dituzte eta gure Javier Bustamante Unzueta santurtziar ospetsuari egingo diote omenaldia.